الأحد، 28 سبتمبر 2008

صنع في الصين؟؟؟؟؟

أنا من محبي التسوق، و زي معظم السيدات و البنات اعجبت بفكرة المحلات اللي طالعة من فترة (بـ 2,5) اللي بنلاقي فيها الادوات المنزلية و الهدايا الجميلة باسعار رخيصة جدا.
لكن الشئ اللي خانقني في الموضوع انه كله صنع في الصين ، و الله يا جماعة في حاجات الاقيها جميلة جدا و معمولة من خامات حوالينا و فكرتها جميلة و بسيطة و تكون مستوردة جاهزة من الصين ، الله يهد حيل القوي يعني احنا كنا اتكسحنا في ايدينا علشان نخلي الصينيين يعملولنا الحاجات البسيطة دي و كمان نستوردها و ندفع عليها فلوس ..

طب انا هاحكيلكم حكاية....

من حوالي 3 أو 4 سنين امي كانت تدير مكتبة للأدوات المكتبية و الخردوات و الاكسسوارات ، و كنت باساعدها في شراء البضائع من تجار الجملة، كانت والدتي بحكم خبرتها بعرض و طلب الاقلام الجاف تطلب جميع منتجات اقلام بريما PRIMA اللي كلنا بنحب نكتب بيها مع انها تعرف انها اغلي من الانواع الصيني الاخرى شئ بسيط
اسغربت و لكنها قالتلي ان الاقلام دي الناس بتطلبها بالاسم و عارفين الانواع اللي بسن تخين و سن رفيع و خطها حلو و كمان صناعة مصرية و دة اللي بيخليني اصر اني اجيبها للمكتبة فاستغربت و قلت اهي حاجة نفخر بيها ان اقلام نضيفة بالشكل دة و صناعة مصرية ، ردت و قالت و الله يا بنتي في حاجات مصرية كتير كويسة و خامتها احسن من الصيني مليون مرة لكن الفرق ان الشكل النهائي للمنتج الصيني حلوة جدا من برة و المنتج المصري (يغم النفس) الا من رحم ربي ، و عندك اقلام جيلسيGelsy الرصاص و الالوان برضة مصري ، قلت مش ممكن دى اقلام نضيفة جدا و كنت فاكراها مستوردة من اوروبا و الله حاجة حلوة جدا و في أمل ...
المهم ..... بعد شهرين من الحوار دة لقيت والدتي بتقولي بصي على العلبة دي .. و كانت علبة اقلام بريما ،، قلت مالها ، قالتلي ركزي شوية في الاسم...ببص لقيته PRIMO ..!!! يخرب بيوتكم يا صينيين القلم مكتوب عليه صنع في الصين يعني الحاجة الكويسة عندنا تضربوها ؟؟!!
قالتلي ان العلبة ارخص شوية من البريما الاصلي انما يتباع بنفس السعر للمستهلك و هو مش هياخد باله في الاول لأنه نفس الشكل بالضبط ، و قالتلي ان البريما الاصلي قليلة جدا في السوق لأن التاجر بيدور على الربح و دي اقلام ارخص من الاصلي و نفس الشكل و لول باعها تاجر الجملة للتجزأة بسعر اقل برضة هو الكسبان وا ن تجار التجزأة اللي مش واخدين بالهم مش هيشتروا الغالي و يسيبوا الرخيص...... يعني الصين دعبست لحد ما ضربت الصناعة بتاعتنا و غزت السوق المصري ببديل المصري...

علشان كدة نفسي نبدأ بايدينا علشان نسيطر على غزو الصين التجاري لينا ، و ياريت محدش يقول وانا مالي و الموضوع و الله كلنا هنستفيد منه و محدش هيشتغل ببلاش بس انتوا شدوا حيلكوا معايا و نساعد بعض ..

هتقولولي ازاي ؟؟؟
بصوا انا في افكار في دماغي بالهبل بقدر نعملها بس محدش هيقدر يشتغل لوحده و في نفس الوقت محدش يستنى حد يبدأ و يجرب فيه، و طبعا الافكار دي باحاول احجمها ماتخرجش كلها مع بعض لأنها ممكن تتكعبل في بعض و مافيش حاجة منها تشوف النور ، فهاخدها واحدة واحدة...

الاول النهاردة و لحد ما ارجعلكوا تاني عايزة ردود الناس كلها و كل واحد يقول افكاره و مهاراته و ممكن يعمل ايه و طبعا لو فيه استشارات من ناس بتفهم في التجارة و الصناعة و التسويق ابقى حسيت ان الموضوع اللي انا واخداه بجد في ناس برضه واخداه بجد...

و الي ان التقي بيكم...
مشمشه مصرية
26/9/2008