المشاكل اللي بتخلي الجمهور يبعد عن المصري و يفضل الصيني
تعالوا نمسك حاجة حاجة
و ارجوكم عايزة تعليقاتكم فيها افكار بجد
-المنتج المصري ردئ ...
-من اي جهة؟
- من كله..
- لأ ،حدد من فضلك
- طيب،.. الجودة..
- المنتج الصيني ممكن يكون اسوأ جودة من المصري و بالعكس فيه منتجات مصرية كثيرة عالية الجودة و المصانع المصرية زي اي مصنع برة بتنزل منتجات من جميع الفئات و زي ما فيه منتج فرز اول فاخر فيه فرز تاني وفرز شعبي...
أمثلة على منتجات مصرية الناس بتطلبها بالاسم و تدقق في الماركة و ترفض تدفع في الصيني مليم
- زي ما قلت قبل كدة اقلام بريما الجاف و الاوان الفلوماستر
-اقلام جيلسي الرصاص و الالوان الخشب
- ملابس ماركة كارينا الاصلي ( لو دققتوا تلاقوا الفرق بين المصري و الصيني واضح جدا و المصري طبعا بيعيش معاكي الا الصيني يدوب على طول)
- ملابس فيجا الحريمي و قطونيل الرجالي
- السجاد المصري (النساجون الشرقيون) (اسعار الفرز التاني اللي فيه ديفوهات من الظهر و ما بتكونش باينة معقولة قوي )
- السيراميك ( كل انواع السيراميك الموجود في مصر و الحمد لله مصري و كل ماركة لها فرز اول و تاني .... و كلهم احسن من بعض)
- الاقمشة القطنية ( طبعا القطن طويل التيلة المصري الوحيد بجودته في العالم)
انا قلتلكم اللي جه على بالي دلوقتي، انما في غيرهم كتير....
شكلي كدة عاملة زي ما اكون اعلان ... بس و ماله لما اعلن عن منتج مصري بس بصراحة الحاجات دي عن تجارب شخصية و ناس حواليا
خلاص ؟ عرفنا ان في منتجات كتيرة مصرية ممكن تكون جودتها اعلى من الصيني؟؟؟
طب دا انا عايزة اقولكم حاجة ده معروف عند الناس كلها لما تقول عن جودة مش قد كدة " دة صيني" مش كدة ولا ايييه؟ (:
المهم ..
المظهر الخارجي و "الفنش"
انا عن نفسي عندي احساس ان دة من الحاجات الرئيسية اللي بتخلى الاقبال على شراء المنتجات الصيني كتير
و بردة يا ريت حد من المتخصصين يرد على المقال في فكرتي
المنتج المصري مهما كانت جودته عالية، العبوة بتاعته تعطي انطباع عكس كدة تماما قال ايه بيوفر في نفقات البيع و يقلل من سعره
يعني مثلا ناس من مصنعي الشموع المصريين ( و على فكرة تصنيع الشموع في مصر على اعلى مستوى) يحط شمعة او اثنين في غاية الجمال و الروعة في كرتونة بني شكلها مقرف يخبي جمالها و يحرق البضاعة عند كل المشترين
في حين الصينين العباقرة عرفوا ان كتير من المصريين بيحبوا المظاهر و من برة هالله الله و من جوة يعلم الله و بدأوا يلعبوا على النقطة دي
فخلوا المنتجات بتاعتهم من برة جميلة على حساب الجودة
و اعتقد دة مش عيب في بعض المنتجات زي الهدايا و الاكسسوار مادام معروفة انها هتستخدم لفترة صغيرة و خلاص او مش للاستخدام الشديد
كمان منتجات الصينين دايما في تجديد
يعني عمرهم ما عملوا منتجات هي نفس المنتجات اللى عملوها السنة اللي فاتت لازم تلاقي في جديد و تغيير و خروج عن المألوف ودة اللي بيعتبره المصريين مغامرة و معظم المصريين ما يحبوش يخوضوا المغامرة ..... مع ان في وجهة نظرى دي مش مغامرة قد ماهي ابداع و تجديد
يعني مثلا
لو تلاحظوا كل سنة فوانيس رمضان بيطلع منها اشكال و انواع جديدة من اول الاغاني لحد الفانوس الجمل و الحاجات الغريبة دي
و الاكسسوار كل سنة في موضة ( سواء اكسسوار اللبس او اكسسوار الموبايل و الام بي 3)
و على فكرة مش احنا اللي بنطلع الموضة لا... احنا بنمشي عليها بس...
يعني الصين نزلتلنا اكسسوار شكل معين غريب و جديد و جميل غرقت بيه الاسواق هتلاقيه في الاول مش بيعجبك و تستنكره انما لما تلاقي ناس كتير بدأت تشتريه و تستخدمه يحلى في عينيك و تصر ان يكون عندك منه
و خد بالك في محلات او مستوردين لما يلاقوا البضاعة معصلجة معاهم و محدش عايز يقرب لها يبدأوا ينزلوا شباب و بنات يستخدموها و يوزعوا منها هدايا على معارفهم يستخدموها قدام صحابهم و يعددوا مزاياها و يحسسوك ان ازاي انت عايش من غير الحاجة دي؟
و طبعا الكل يروح يشتري منها ودي سياسة تسويق مش متبعة في تسويق المنتجات المصرية
كفاية كدة النهاردة اكيد صدعت دماغكوا
ارجوكوا احب اسمع تعليقات على محتوى الرسائل
و ياريت تقروا الرسائل اللي فاتت
مشمشة مصرية