الجمعة، 17 يوليو 2009

الفكرة التانية ... كرات الاستحمام الفوارة



بقالي كتير ما كتبتش بس اعذروني


نيجي بقى للفكرة التانية

بصراحة لسه ماشفتش الفكرة دي نزلت مصر من المنتجات الصينية و اقترح نبدأ فيها قبل ما تنزلنا من الصين

(مش ملاحظين ان المنتجات الصينية ابتدت تقل في مصر؟ أكيد علشان الازمة الاقتصادية بس مش مهم ياللا بقى علشان نبقى احنا الكسبانين)

المهم،،

كرات الاستحمام دي عبارة عن كرات من الصابون الفوار المعطر اول ما بتنزل في مياه البانيو تفور و تعمل رغوة حلوة و ريحة جميلة دة غير انها بتنعم الجلد






دي هتكون موضة كويسة جدا بالذات الناس محتاجة تغير طريقة حياتها و بيتلككوا علشان اي تغيير

الموضوع زي ما قلنا من الاول محتاج الاول دراسة جدوى قبل ما تبتدي

طب مش نعرف الاول بتتعمل ازاي دي

ادي فيديو ترجمته لطريقة عمل الكرات











المقاديــــــــــــــــــــــر
--------------
1 كوب بيكربونات الصودا (ممكن عند العطارين و محلات الكيماويات)

3/4 كوب حمض الستريك البودرة (ممكن عند العطارين و محلات مستلزمات الحلويات)

2 ملعقه كبيرة من الكاولين الابيض(ممكن محلات الادوات التجميل ،ومحلات الكيماويات، ومحلات المنظفات)
1 ملعقة كبيرة من زيت جوز الهند (من عند العطارين)
2 ملعقة صغيرة من بولي سوربات 80 (من محلات بيع الكيماويات و المنظفات)
زيت فيتامين هـ (من الصيدليات )

1 ملعقة صغيرة زيت عطر (من محلات تركيبات العطور)

1/4 ملعقة صغيرة بوراكس بودرة (اعتقد من عند العطارين و المنظفات)

1/4 ملعقة صغيرة من لون( من محلات الحلويات)

12 رشة كحول ابيض ( من اي صيدليه و الكيماويات)
الادوات اللي هتحتاجها
--------------
- سلطانية كبيرة

- جوانتيات بلاستيك بلاش لاتيكس ممكن جوانتي الكيس الشفاف رخيص جدا
- بخاخه رذاذ خفيف للكحول بس حللي بالك تكون مقفوله كويس علشان الكحول مايتبخرش
- قوالب بلاستيك ممكن على شكل كور او قلوب و ممكن كمان تستخدموا قوالب على شكل بيض (عارفين البيض البلاستيك اللي بيكون فيه شكولاته ممكن نستخدمه)
- كوب عياري و ملاعق عيارية من محلات الادوات المنزليه
- قلوب فوم من اللي عملناها المرة اللي فاتت او ممكن استيكرات صغيرة
- ادوات تعبئة و تغليف ممكن تكون سلوفان ، كريشة، ورق لف هدايا ، مناديل ورق جامدة شوية و ممكن علب شفافة للهدايا و شرايط و حاجات كتير لو نزلت درب البرابرة ممكن تلاقي كل الحاجات دي عند بتوع مستلزمات السبوع و تلاقي افكار تانية ....
- كروت صغيرة جدا ممكن تعملها بنفسك و هاكلمكم عنها في مرة تانية

- كراتين و علب للتعبئة النهائية


الطـريـقـة :
********

في سلطانية عميقة حط كوباية واحدة بيكربونات الصودا و3/4 كوب حمض الستريك( هو ما يصنع الفوران ) و 2 ملعقه كبيرة من الكاولين الابيض و قلبهم كويس

في كوب اخر نحط ملعقة كبيرة من زيت جوز الهند و 2 ملعقة صغيرة من بولي سوربات 80 و 1/4 ملعقة صغيرة من اللون
و ربع ملعقة صغيرة من البوراكس البودرة نحط ملعقة صغيرة بس من الزيت العطري بس ماتزودش علشان ميبقاش طري قوي (احنا عايزين قوان معين) و نقلبهم كويس في الكوباية

لاحظ انك لو ماحططش البوراكس اللون عمره ما هيدوب في الزيت اوكي؟

و بعدين صب الخليط على البيكربونات و قلبهم مش هيعمل معاك عجينه بس هيرطب البودرة بس اقعد قلب و اعجن و اعملها زي ما بنبس الكحك لحد ما الخليط يتجانس (انصحكم بمتابعة الفيديو )

و بعدين البخاخة اللي فيها الكحول رش 3رشات و اعجن كويس و كررها 4 مرات (يعني هترش 12 رشة ) بعد كل 3 رشات قلب كويس

اوكي؟


المفروض دلوقت الخليط بتاعك عامل زي الرمل المبلول اللي بنعمل منه قصور الرمل في المصيف

هتمسك القالب اللي هو المفروض نصين و تحط في قعر نص منهم القلب الفوم او الاستيكر بس وشه يكون مقلوب و بعدين تكبس كل نص بالخليط و خلي بالك من الحتة اللي قالتها في الفيديو زود شوية على ناحية منهم و اقلبهم على بعض و ماتلفهمش بس زحلقهم على بعض و اكبس قوي لحد ما يبقوا حتة واحدة و فكها من القالب بشويش و سيبها تنشف 24-48 ساعة و بعدها ابقى استخدم مواهبك في التغليف


بس...
خد بالك زي ما قلنا المرة اللي فاتت لازم تلف كام لفة قبل ما تشتري اي حاجة اعرف اسعار المواد الخام و دور لو لقيت سلع شبيهه ممكن تدور في ماي واي و ايفون و اورفليم الحاجات دي اسعارها ايه فيها و محلات التجميل و السبا و ما تتكسفش و اسأل تاني

و فكر الكرة هاتقف عليك بكام و هتبيعها بكام بعد حساب ليك نسبة ارباح



التسويق بقى اهم حاجة
===========


في المولات و الكوافيرات و مراكز التجميل و محلات بيع مستلزمات الكوافير (يستحسن تستعين بسيدة في جس النبض في الاماكن دي )


و كل دة قبل ما تبدأ في الشراء و التنفيذ

اول مرة تعمل الخلطة جرب في كميات صغيرة الاول و ما تشتريش كمية كبيرة من المواد الخام في اول مرة
ياللا
و اللي ابتدا يا ريت ما ينساش يسيب تعليقه
سلام