يا نهار زي بعضه… علم مصر …..صيني؟؟!!!

النهاردة كنت بتفرج على برنامج بيت شريف بتاع شريف مدكور على قناة نايل لايف و اتخضيت و كنت هالطم لما قال ان اعلام  مصر المنتشرة دلوقت علشان ماتش مصر و الجزائر (يا رب انصر مصر ) قال دي صيني …

يالهوي                                          

دا انا كانت في دماغي اعرض لكم فكرة صناعة الاعلام بمناسبة مباريات مصر بس قلت بلاش في ناس مجتهدة و هي اللي عاملة المشروع دة بلاش نقفل عليهم ,,,ولاد الايه يطلعوا صينيين…

بجد انا دمي اتحرق

امال المصريين فين لما يخلوا الصينيين يصنعولنا علم مصر و احنا زي البشوات نشتري منهم و احنا مش لاقيين شغل …. بجد عيب علينا ، و بجد عيب على اللي استورد منهم ولو اني متخيله انهم اتصنعوا في ورش الصينيين اللي في مصر

طب ليه معملهاش ناس من عندنا … و ماشاء الله الناس اللي شغاله في مكاتب الدعاية و الاعلان اقرب ناس للموضوع

دي كلها 3 اتواب قماش (اسود و احمر و ابيض)

و علبه الوان قماش صفراء او سبراي اصفر

و نسر مصر مرسوم و متفرغ بطريقة الاستنسل

و كام متر عود خشب ..

و رأس المال الثابت

هو مقص حامي

و مكينة خياطة

و دباسة خشب

و قص يا سيدي الاتواب كلها مستطيلات بابعاد مناسبة) المفروض الطول ½ العرض ) يعني لو عملنا العلم بعرض متريبقى الطول 50سم و قسم ال50 دول على 3 هيطلعلك تقريبا 16 سم (خد بالك لازم تقص اكتر شوية من القياسات علشان تعرف تخيط)

و خيط الالوان الثلاتة في بعض و اطبع النسر في النص .. و بعدين دبس العلم في الخشب … و خلاص

دي بقى محتاجة نستورد علمنا من الصين؟؟؟!!

و الله عيب علينا … بس لهم حق الصينيين يعملوا فينا كدة ، ما احنا اللي استسهلنا و قلنا ادينا بنستورد .. طب و اوجع دماغي ليه بالتصنيع

خدوا بالكم المستورد اللي بيجيب الحاجات دي من الصين هو و الصينيين بس اللي بيستفيدوا

انما اللي بيعمل هنا الحاجة بيستفيد و يفيد ناس كتير عايزة تشتغل

و ربنا يوسع رزقنا و رزقكم

سلام

صناعة السبح

الموسم بقى يلا نشمر ايدينا
حمدالله على السلامة يا حاج
حج مبرور يا حاجة
يا رب السنة الجاية كلنا نكون على عرفات (يا رب يارب يارب )

مع ان المفروض الحجاج غالبا بيجيبوا للناس هدايا من السعودية سبح و سجاجيد صلاة
بس عرفت ان فيه كتير بيقولوا ان السبح و السجاجيد في السعودية صينية (برضة ما فيش فايدة) و زي اللي بتتباع في الحسين و بدل ما نشيل من السعودية لمصر هدايا و ووزن و شيله و كمان الحاجات دي هناك بتبقى اغلى من هنا
يقوموا يشتروها من مصر و يوزعوها هدايا علشان ماحدش يزعل انه نسي يشتريله من هناك
طيب بدل ما تكون السبح صينية ما نعملها احنا
و سهلة جدا جدا


طيب


طبعا قبل ما نبتدي اي مشروع زي ما قلنا قبل كدة لازم ندرس و نلف كام لفة كدة علشان نضمن تسويق كويس للمشروع

هتلف تسأل عن اسعار و اشكال السبح (بالجملة ) و لازم هنا بقى تعرف الاشكال و الابتكارات كويس قوي علشان انت بقى تبتكر حاجة او شكل جديد


طب شكل جديد ايه في السبح ؟؟؟


ممكن تبتكر و تغير في شكل الشرابة مثلا...
المكونات اللي هتحتاجها و هاتسأل عليها ...
خرز كبير :

حاول تبعد شوية عن البلاستك الا لو لقيت اشكال جديدة و مناسبة و تقيلة شوية
يفضل الخرز الزجاج اللي اشكاله متعددة


خرز خشب اهو دا بقى ممكن يكون اوفر من الزجاج مع ان مثلا الكيلو منه يبقى اغلى من الزجاج الا ان كيلو الخشب يعمل اكتر بكتير من الزجاج ( ما تنساش ان الزجاج بيوزن ) و بصراحة بشوف اشكال روعة و جميلة
خرز الفواصل
لو انت هتجيب الخرز الاساسي بتاع السبحة مدور و كبير اختار خرز فواصل مبطط و مقاسه مناسب ... اما لو لقيت اشكال الخرز السبحة الاساسي مبطط اختار الفواصل مكورة
(هو ايه خرز الفواصل دا اساسا ؟؟؟
ما تستعجلش هاقولك )
خرز طويل علشان تعمله الشرابة
خيوط سميكة
اللي هتلضم فيها الخرز يستحسن تجرب الخرز على الخيط قبل ما تجيبه علشان تجرب سلاسة مرور الخرز فيها و دة بالذات تخلي بالك جدا و انت بتجيبه علشان دة الاساس يعني لا يكون ضعيف فيفك من السبحة و لا يكون خشن يصعب مرور الخرز و خصوصا الخشب منه
خيوط حرير تعمل منها الشرابة

ابر كنافاه
دي ابر طويلة و عينها واسعة تسمح بمرور الخيوط السميكة و في نفس الوقت حرفها غير مدبب علشان ما تعورش اللي بيستخدمها

مقص حاد
اداة قياس

حاجات مش لازمة قوي بس ممكن تعمل حاجات احسن
اكسسوارات للسبح


انواع السبح
السبحة الصغيرة تحتوي على 33 خرزة و فاصلين متقسمين كدة 11-11-11و تربط النهايتين بالخرزة الطويلة و الشرابة

دة الاحسب لو حجم الخرزة كبير
انما لو جايب خرز صغير نسبيا او مبطط هتبقى حلوة قوي لو عملتها 99 خرزة متقسمة بفاصلين 33-33-33 و برضه تجمعهم بالشرابة


الخطوات

اول حاجة قيس طول الخيط المطلوب للسبحة الواحدة بانك ما تقصش الخيط بس الضمه في الابرة و بعدين الضم الخرز حسب العدد المطلوب يعني مثلا 10-فاصل-11-فاصل-10 و زود على الطول دة حوالي 10 سم لزوم الربط ( خد بالك السبحة مش زي الاعقاد، لازم تكون الربطة واسعة شوية بين الخرز علشان يسمح بالعد )بس بقية ال10 سم لزوم العقد
قست الطول ؟؟؟

اوعى تقص دلوقت
اضرب الطول دة مثلا في 3 او 4 يعني انت هتلضم 4 سبح مرة واحدة و بعدين تقص و تلضم مرة واحدة ( توحيد العمل ) صدقني هيوفر وقت كتير جدا و هيفتح نفسك للشغل بعد ما تحس انك انجزت كمية كتير في اقل وقت
قسمت الاربع سبح؟
اربط بقى
ما تنساش تسيب حوالي 1 سم مهوي (يعني لازم ما تكتفش الخرز في بعضه ) قبل ما تعقد
ما تقصش بقيه الخيط الطويل


نعمل الشرابة بقى



هات كرتونة طولها حوالي 10 سم و لف عليها الخيط الحرير كذا مرة حسب سمك الخيط المهم ان الشرابة تكون معقوله



و اللفة على الكرتونة لسه لم اللفات كلها بربطة واحدة في الطرف

(اعتذر على قلة جودة الصور بس هاتعلم اصور كويس ان شاء الله)

اسحب بقى اللفه من الكرتونة

حزم اللفة على بعد 1 سم من العقدة بكذا لفة من نفس الخيط


(الحمد لله الصورة اتحسنت شوية )

قص دلوقت الطرف السايب من اللفة كدة






هيبقى شكلها كدة



هتلضم خيوط السبحة اللي ما قصتهاش في الخرزة الطويلة و الشرابة بالشكل دة

اهم حاجة بقى


العقد لازم تكون مخفيه خوة الخرز


العقد لازم تكون مربوطة بقوة جدا علشان السبحة ما تفكش



افكار بقى للتميز


الشرابة ممكن تكون عبارة عن كام خيط معقود فيه خرز صغير و اخر كل خيط خرزة اكبر شوية


الخرز نفسه ممكن تكسيه خرز صغير

و ان شاء الله هاكتب ازاي تعملوا الخرز دة في يوم تاني

ما تنساش خطوات دراسة السوق اللي اتكلمنا عليها كتير قبل كدة
و التسويق
و لو شغلك جميل جدا و على مستوى ممكن كمان تسوقه على النت

اشوفكم قريب ان شاء الله

الفترة اللي جاية هي الموسم يلا نشمر اكمامنا

كل سنة و انتم طيبين

الفترة اللي جاية كلها مناسبات

حج مبرور

الفالنتين

عيد الاضحى

رأس السنة الميلادية و اعياد الكريسماس

و معظم الاعياد دي بتحتاج هدايا

و ممكن نتشجع و نبتدي مشروع صغير نجرب فيه نفسنا و خصوصا في الموسم

الافكار هي

صناعة المسبحة (السبحة) و دي هدايا الحج

الفالنتين حاجاته كتير قوي هنعمل منها ان شاء الله علب الهدايا و شنط الهدايا و قلوب و حاجات كتير

زينات رأس السنة للاخوان المسيحين مثل عرايس بابا نويل و التعليقات على شجرة الكريسماس كلها باذن الله حاجات سهلة الصنع و بخامات بسيطة و موجودة و لو شدينا حيلنا هتكون ارخص من الحاجات المستوردة و اجمل كمان

يلا سلام و نتقابل على خير